جربتها من منتدي تاني و ده تطبيقي.......مع ابداعي...

أنا كان عندي مشكلة مع ولادي وده الطبيعي طبعا مع كل الامهات
أنهم ما بيسمعوش الكلام أبدا
دايما مغلبيني
حاولت معاهم بكل الطرق
عقاب طبعا حرمان من اللعب ومن التلفزيون ومن المصروف وخصام وكل ما تتخيلوه عملته
وهما ولا الدموع ولا حاجة بقيت فارقة معاهم
حتى لما اشتكيتهم لباباهم وبدأ ياخد موقف معاهم ويعاقبهم
اكتشف انهم ما بيسمعوش كلامه هو كمان رغم انهم المفروض بيخافوا منه أكتر مني وبيعملوا له ألف حساب
بجد الموضوع ده كان تعبني جدا نفسيا وعصبيا
وخاصة أنهم بطلوا يحفظوا القرآن بانتظام وبيصلوا متقطع بالعافية
المهم
لقيت هنا في المنتدى الرائع ده فكرة ممتازة بل أكتر من ممتازة
لفتوكة اسمها غايتي رضاك ربي
وده اللينك بتاع موضوعها
http://forums..com/thread3131049
ومضمون الفكرة وده اللي عجبني هو المكافأة بدل من العقاب
يعني بدل ما تنوعي في العقاب ابدئي نوعي في المكافأة
شوفي ولادك بيحبوا ايه وكفأيهم بيه
مش كده وبس أنتي اتلكيكي لهم على اي حاجة صح يعملوها مش العكس
مشكلتنا إننا كنا بنتلكك على الغلطة وبنكتر من العقاب والزعيق لغاية ما الولاد بيتنحوا وما بيفرقش معاهم

المهم بعد ما قريت الموضوع عجبتني فكرة صندوق المفاجأت وقلت دي مناسبة جدا للأولادي لأنهم بيحبوا جدا المفاجأة حتى لو كانت حاجة صغيرة
واللي خلاني اكتشف ده أنهم بيضيعوا معظم مصروفهم على حاجة كده اسمها كرومبو
ودي بنص جنية وعبارة عن علبة ورق بيبقى فيها هدية ممكن مرة صفارة وممكن خاتم وحاجات كده فاضية وملهاش لازمة
ومع ذلك الولاد بيشتروها بجنون لدرجة أني قلت لهم ما تشتروا صفارة ولا باللونة على طول هتبقى أرخص

ما علينا دورت عندي على صندوق قديم وجبت كيس كان شكله حلو وقصيته ولازقته على الصندوق
وعملت فاتحة في الصندوق من فوق وفاتحة صغنونة من الجنب
ونزلت علة محلات ال2 ونص واشتريت شوية حاجات كده ( محفظة- لعب - مرايا بالمشط- مقص أطفال..)
واحترت احط الحاجة ازاي فرحت لمقلة لب ولقيت عنده أكياس سبوع شكلها تحفة ال100 كيس بعشرة جنية اشتريتها وجيبت كمان ربع كيلو سوداني بقشرة وبنبوني وفندام
وفتحت كيس السبوع وحطيت فيه شوية سوداني وكيس فندام وبنبوني مع الهدية وقفلته وحطيته في الصندوق

وجيبت طبق فوم كبير رسمت عليه 3 قلوب كل قلب باسم واحد من الولاد
وجبت دبابيس بيضا ودبابيس ملونة
ونيجي بقى للمهم
عملت لهم تسعيرة

كل واحد هيعمل حاجة صح هياخد دبوس أبيض
وعشر دبابيس بيضا يساوي مفتاح لهدية صغيرة من الفاتحة اللي في الجنب
ولو عمل حاجة ممتازة ياخد دبوس ملون
و10 دبابيس ملونة هياخد هدية مميزة من الفاتحة الكبيرة
الفرق كان أن الفاتحة الصغيرة بتخرج كيس مفيهوش غير سوداني وحلويات
والفاتحة الكبيرة بتخرج كيس فيه ألعاب
وفعلا بدأنا الحكاية دي وما شاء الله
اللي بينام بدري بياخد دبوس واللي بيصحى بدري بياخد دبوس
واللي بيصلي كل الصلوات في ميعادها ومع السنن بياخد دبوس أسود وده بيساوي خمسة من الأبيض
واللي بيحفظ سورة جديدة بياخد دبوس ملون
وكل يوم لو سمعها صح بياخد عليها دبوس ابيض تاني
واللي بيحافظ على نظافة ملابسه وشعره مسرح وجميل طول اليوم بياخد دبوس
واللي بينظف اللي عليه بياخد دبوس
واللي بيملى الازايز بياخد دبوس
واللي بيعامل أخواته كويس بياخد دبوس
ده طبعا نماذج للدبابيس

وفي آخر اليوم بعمل لهم اجتماع وكل واحد فيهم أخواته ببيحكموا عليه إذا كان يستحق دبوس ولا لأ وده بيتوقف على أنه كان بيتعامل معاهم طول اليوم كويس ولا لأ

وفي الآخر بنجمع الدبابيس ونشوف مين كمل دبابيسه ويستحق ياخد المفتاح

ولما حد فيهم بياخد المفتاح اللي هو عبارة عن دبوس كبير شوية علشان يفتح الصندوق لازم ينط عشر نطات وبعدين يغمي عينه بإيشارب ويقول سبحان الله 10 مرات والحمد لله 10 مرات والله أكبر 10 مرا واستغفر الله ولا إله إلا الله وبعدين يصلي على النبي صل الله عليه وسلم فينفتح الصندوق ويختار هدية
طبعا الولاد فرحوا جدا بالموضوع ده وحياتهم اتغيرت تماما معايا وما شاء الله لا قوة إلا بالله
بقوا يناموا بدري ويصلوا كل الصلوات في ميعادها ومش كده وبس كمان بقوا يصلوا الضحى وقيام الليل 8 ركعات علشان ياخدوا دبابيس أكتر ومعاملتهم مع بعض اختلفت تماما كل واحد بيحايل التاني علشان في التقييم يديلوا دبابيس
وبقوا يقروا قصص ويرسموا علشان ياخدوا دبابيس
يارب تكون تجربتي عجبتكم وينفعكم بيها اللهم آمين
منقول